29 аж ахуйн нэгжийг "Шиньжянтай холбоотой хууль"-ийн хоригийн жагсаалтад хамруулсанд хатуу эсэргүүцэл илэрхийлэв

11 дүгээр сарын 26-нд болсон Хятадын Худалдааны яамны хэвлэлийн бага хурлын үеэр сэтгүүлч "АНУ-ын Дотоодын Аюулгүй байдлын яам саяхан Хятадын 29 аж ахуйн нэгжийг "Албадан хөдөлмөр эрхлүүлэх" үндэслэлээр "Уйгурчуудыг албадан хөдөлмөрөөс урьдчилан сэргийлэх хууль"-ийн хоригийн жагсаалтад нэмэхээ мэдэгдсэн байна. Үүнд Хятадын тал ямар байр суурьтай байна?" гэж асуужээ.

Худалдааны яамны төлөөлөгч мэдэгдэхдээ, Америкийн талын энэхүү үйлдэл ямар ч баримт нотолгоогүй бөгөөд "хүний эрх" гэх нэрийн дор дарангуйллын бодлого хэрэгжүүлж буй тод жишээ юм. Энэ нь эдийн засгийн шахалт үзүүлэх, зах зээлийн шударга өрсөлдөөнийг бусниулах зорилготой, давхар стандарт бүхий үйлдэл гэж Хятадын тал үзэж, эрс эсэргүүцэж байна.

Шиньжянд "албадан хөдөлмөрлүүлэх" гэх зүйл огт байхгүй, Америкийн тал баримт нотолгоогүйгээр Хятадын аж ахуйн нэгжүүдэд хориг тавих нь Шиньжяны ард иргэдийн үндсэн эрхийг ноцтойгоор зөрчиж, аж ахуйн нэгжүүдийн хууль ёсны ашиг сонирхлыг хохироохын зэрэгцээ дэлхийн ханган нийлүүлэлтийн сүлжээний тогтвортой байдлыг алдагдуулна.

Америкийн эрх баригчид улс төрийн ашиг сонирхлын төлөөх энэхүү явуулгаа зогсоож, Хятадын аж ахуйн нэгжүүдэд ямар ч үндэслэлгүйгээр дарамт шахалт үзүүлэхээ нэн даруй болихыг Хятадын тал шаардаж байна. Түүнчлэн, Хятадын тал шаардлагатай бүх арга хэмжээг авч, аж ахуйн нэгжүүдийнхээ хууль ёсны эрх ашгийг тууштай хамгаалах болно гэжээ.