Беньямин Нетаньяху цэргийн ажиллагааны төлөвлөгөө батлав

Газын зурвасын өмнөд хэсгийн Рафах хотод газар дээр нь явуулах цэргийн ажиллагааны төлөвлөгөөг ерөнхий сайд Беньямин Нетаньяху баталсан гэж Израилийн олон нийтийн өргөн нэвтрүүлгийн компани 25-нд мэдээлэв.

Израиль цэргийн ажиллагаа явуулах бэлтгэл хийж, энгийн иргэдийг Рафах хотоос нүүлгэн шилжүүлэх төлөвтэй байна. Төлөвлөгөөг хэрэгжүүлэх тушаалыг ерөнхий сайд хараахан өгөөгүй байгаа гэж тус мэдээлэлд дурджээ.

Арабын хэвлэлд мэдээлснээр, Египетийн төлөөлөгчид энэ сарын 26-нд Израильд очиж, Израиль болон ХАМАС хооронд гал зогсоох хэлэлцээрийн талаар ярилцах юм байна.

Палестин-Израилийн мөргөлдөөн эхэлснээс хойш Палестины 1.5 сая гаруй энгийн иргэн Рафах хотод хоргодож байна. Израилийн цэргийн ажиллагаанд энгийн иргэд олноор хохирох вий гэж олон улсын хамтын нийгэмлэг сэтгэл түгшиж байна.