Аргентин Хорватыг хожсоноор шигшээд шалгарлаа

Катар улсад зохиогдож буй Хөл бөмбөгийн ДАШТ-ны хагас финалын эхний тоглолт өнгөрсөн шөнө болж, Лионел Месси нэг гоол, нэг оновчтой дамжуулалт өгсөн гайхалтай тоглолтыг үзүүлж, Аргентины шигшээ баг Хорватын багийг 3:0-ээр хожиж, 8 жилийн хойно ахин ДАШТ-ны финалд шалгарлаа.

Аргентины домогт Марадона 1986 оны дэлхийн аварга шалгаруулах тэмцээний үеэр эсрэг багийнхаа олон хамгаалагчийг хууран довтолж оруулсан гоолыг хөл бөмбөгийн түүхэнд “Зууны гоол” гэдэг байсан бол өчигдөр Лионел Месси “Зууны оновчтой дамжуулалт”-ыг үзүүллээ. Тоглолтын 2-р хэсэгт Лионел Месси ид шидийг үзүүлж, ур чадвараа харуулан баруун жигүүрээр бөмбөгтэй довтлон, Жулиан Альварест дамжуулснаар гоол болжээ. Энэ нь Аргентины ялалтын гоол байв.

Баг нь ялж, Лионел Месси ч хувийн үзүүлэлтээрээ олон дээд амжилтын эзэн боллоо. Тоглолтын эхний хагаст тэрээр торгуулийн цохилтыг амжилттай гүйцэтгэж, ДАШТ-д 11 дэх гоолоо оруулснаар Аргентины шигшээ багийн өмгөөс ДАШТ-д хамгийн олон гоол оруулсан тоглогч болсон. Энэ нь түүний ДАШТ-ны 25 тахь тоглолт байж, Германы домогт тоглогч Маттаусын үзүүлэлттэй тэнцэж ДАШТ-ны тоглолтод хамгийн олон удаа оролцсон тоглогч боллоо. Лионел Месси энэ удаагийн ДАШТ-нд өнөөгийн байдлаар 5 гоол, 3 оновчтой дамжуулалт өгч, мөн 5 гоол оруулсан Франц довтлогч Килиан Мбаппегээс нэг оновчтой дамжуулалтаар илүүрхэж байна. Энэ нь Лионел Мессигийн 5 дахь ДАШТ, мөн хамгийн олон гоол оруулсан ДАШТ болж байна.

Энэ жил 22 настай Жулиан Альварес энэ тоглолтод хоёр гоол оруулаж олны анхаарлыг татсан бөгөөд тэрээр энэ ДАШТ-нд нийт 4 гоол оруулаад байна.