Хятад улс дэлхийн эдийн засгийн өсөлтөд эерэг нөлөө үзүүлсээр байна

Энэ оны эхний 11 сард Хятад улсын гадаад худалдааны импорт экспортын нийт хэмжээ 38.34 их наяд юаньд хүрсэн нь өнгөрсөн оны мөн үеийнхээс 8.6%-иар өсөн үзүүлэлт болж, худалдааны томоохон түншүүдтэй хийж буй гадаад худалдааны импорт, экспортын хэмжээ нь тогтвортой өсөлтөө хадгалсан гэж Хятадын Гаалийн ерөнхий газраас 7-нд мэдээлсэн байна.

Гуандүнгийн Шаньтөү боомт нь Хятадын “Бүс ба зам”-ын бүтээн байгуулалтын гол боомтын нэг болох бөгөөд өдөрт олон арван мянган бараа бүтээгдэхүүн үүгээр дамжин гадаадад хүрч байна. Тухайн нутгийн эмийн боодол баглааны материал үйлдвэрлэгч компанийн хариуцлагатан “энэ онд бидний захиалга нэмэгдсэн” гэж хэлж байлаа.

Тэрээр хэлэхдээ: “Бид Сингапур зэрэг "Бүс ба зам"-ыг хамтран бүтээн байгуулж буй 10 гаруй оронтой урт хугацааны хамтын ажиллагаатай. Он гарснаас хойш манай захиалгын хэмжээ 12 гаруй хувиар нэмэгдсэн”гэлээ.

Гуандүнгийн Шаньтөүгийн гаалийн газрын статистик тоо баримтаас үзэхэд, он гарснаас хойш "Бүс ба зам” дагуух улс орон, бүс нутагт экспортолсон бараа бүтээгдэхүүний хэмжээ 40 тэрбум юаниас давж, өнгөрсөн оны мөн үеийнхээс 50 гаруй хувиар өссөн байна.

Хятадын Гаалийн ерөнхий газраас мэдээлснээр, энэ оны эхний 11 сард Хятадын гадаад худалдааны экспорт 21.84 их наяд юаньд хүрсэн нь өнгөрсөн оны мөн үеийнхээс 11.9%-иар өссөн үзүүлэлт болж, гадаад худалдааны импортын хэмжээ 16.5 их наяд юаньд хүрсэн нь өнгөрсөн оны мөн үеийнхээс 4.6%-иар өссөн үзүүлэлт болжээ. Хятад улс худалдааны томоохон түншүүдтэйгээ хийж буй гадаад худалдаа нь өсөлтийн хурдаа тогтвортой хадгалж байгаа бөгөөд "Бүс ба зам” дагуух орнуудтай хийсэн импорт экспортын хэмжээ, "Бүс нутгийн эдийн засгийн иж бүрэн түншлэлийн хэлэлцээр"-ийн гишүүн орнуудтай хийсэн худалдааны хэмжээ тус тус 20.4, 7.9 хувиар өссөн байна. Үүнтэй холбогдуулан Хятадын үндэсний мэдээллийн төвийн Эдийн засгийн төсөөллийн газрын Макро эдийн засгийн судалгааны албаны дарга Янь Минь хэлэхдээ, олон улсын солилцооны индрүүд нь Хятад улс худалдааны түншээ өргөжүүлэхэд түлхэц өгсөн” гэжээ.

Тэрээр хэлэхдээ: “Хятад улс "Бүс ба зам” дагуух орнууд, RCEP-ийн орнууд, Өмнөд Америк, Африкийн орнуудтай эдийн засаг, худалдааны хамтын ажиллагаа явуулан,Импортын экспо, Кантоны яармаг зэрэг олон улсын солилцооны үзэсгэлэн зохион байгуулснаар, гадаад худалдааны түншүүд нь улам өргөжсөн байна. Гадаад худалдааны олон ургалч байдал нь Хятад улс дэлхийн нийлүүлэлтийн сүлжээ, зах зээлийн хэлбэлзлийг даван туулах чадварыг дээшлүүлээд зогсохгүй бусад орны эдийн засаг, худалдааны хөгжлийг дайчлан, дэлхийн эдийн засгийн хөгжилд хувь нэмрээ оруулж байна” гэжээ.

Бүс нутгийн түншүүдтэй хийх буй худалдаа эрчимтэй хөгжиж байгаагийн зэрэгцээ Хятадын гадаад худалдаа ч олон ургалч хөгжлийг хадгалсаар ирсэн юм. Тоо баримтад харуулснаар, Хятад улс АСЕАН, Европын холбоо, АНУ, Өмнөд Солонгос зэрэг орнуудтай хийсэн импорт, экспортын хэмжээ тус бүр 5.89, 5.17, 4.62, 2.22 их наяд юаньд хүрсэн нь өнгөрсөн оны мөн үеэс 15.5, 7, 4.8, 4.7 хувиар өссөн үзүүлэлт болжээ. Үүнд АСЕАН нь Хятадын нийт гадаад худалдааны 15.4 хувийг эзлэн, хамгийн том худалдааны түнш болсон байна. Хятадын Худалдааны яамны Олон улсын худалдаа, эдийн засгийн хамтын ажиллагааны судалгааны хүрээлэнгийн захирал Гү Шюмин хэлэхдээ:

"RCEP нь Хятад улсын гадаадтай байгуулсан хамгийн том чөлөөт худалдааны гэрээ бөгөөд дэлхий нийтэд хандан өндөр стандартыг хангасан чөлөөт худалдааны бүсийн сүлжээг байгуулах чухал эхлэл болж байна. Уг гэрээ хэлэлцээр хүчин төгөлдөр болсны дараа бүс нутаг болон Хятадын эдийн засгийн хөгжилд үзүүлэх нөлөөлөл улам нэмэгдэх болно” гэжээ.

Саяхан Хятадын Худалдааны яамны хэвлэлийн төлөөлөгч Шү Жюетин хэлэхдээ, "Бүс нутгийн иж бүрэн эдийн засгийн түншлэлийн хэлэлцээр"-ийн ачаар АСЕАН нь Хятад улсын худалдааны хамгийн том түнш болох байр суурь улам бэхжин, асар их хөгжлийн хүчин чадлыг харуулсан юм. Цаашид Хятад, АСЕАН харилцан ашигтай хоёр талт болон бүс нутгийн худалдааны харилцааг илүү тэлэхэд бэлэн байна гэжээ.

Тэрээр хэлэхдээ: “Хятад,АСЕАН-ы хоорондын солилцоо улам нягтарч, аж үйлдвэр, ханган нийлүүлэлтийн сүлжээний хамтын ажиллагаа гүнзгийрснээр, дэлхийн эдийн засгийн хөгжилд хувь нэмэр онуулагч гол хүчин болсон байна. Хятад улс АСЕАН-ы орнуудтай худалдаа, хөрөнгө оруулалтын хамтын ажиллагаагаа үргэлжлүүлэн бэхжүүлж, бүс нутгийн аж үйлдвэр, нийлүүлэлтийн сүлжээний аюулгүй, тогтвортой байдлыг хамгаалж, харилцан ашигтай хоёр талын болон бүс нутгийн худалдааны харилцааг байгуулахад бэлэн байна” гэжээ.

Хятадын гадаад худалдааны бүтэн жилийн чиг хандлагын талаар мэргэжилтэн хэлэхдээ, гадаад худалдааны орчин ээдрээ будлиантай, тогтворгүй байдал нэмэгдэж байгаа ч Хятад улсын хувьд гадаад худалдаа тогтвортой өсөх олон таатай нөхцөлийг хангасан гэлээ. Тухайлбал, Аж үйлдвэрийн суурь сайтай, гадаад худалдааны компаниуд гэрээ хэлэлцээрээ даган мөрдөж, инновацийн чадавх тасралтгүй дээшилж байгаагийн зэрэгцээ гадаад худалдааг дэмжих төрөл бүрийн бодлого боловсруулан, үр дүнтэй хэрэгжүүлсэн зэргээс болсон гэлээ. Хятадын Худалдааны яамны Бүс нутгийн эдийн засгийн хамтын ажиллагааны судалгааны төвийн захирал Жан Жяньпин сэтгүүлчид ярилцлага өгөхдөө, “ерөнхий байдлаас үзэхэд, энэ онд Хятад улс гадаад худалдааны зорилтоо биелүүлэх бүрэн боломжтой байна” гэжээ.

Тэрээр хэлэхдээ: “Энэ оны Хятадын гадаад худалдааны ерөнхий гүйцэтгэлээс харахад, 4-р улиралд дарамтад учирсан ч гэсэн эхний 3 улиралд сайн үр дүнд хүрснийг тооцвол, энэ онд тавьсан зорилтоо биелүүлэх итгэл найдвар бүрэн байгаа. Бид дэлхийн эдийн засгийн өсөлтөд эерэг нөлөөлөл үзүүлсээр ирсэн” гэжээ.